pwy all faethu

mythau maethu: Gwahanu ffeithiau oddi wrth ffuglen

Mae maethu yn eich galluogi i wneud gwahaniaeth cadarnhaol yn ein cymuned leol. Felly, mae’n gwbl briodol bod ein gofalwyr yn adlewyrchu treftadaeth ddiwylliannol gyfoethog ac amrywiol prifddinas Cymru.

O ran pwy sy’n gallu maethu, rydyn ni’n gofyn: allwch chi wneud gwahaniaeth, ac ydych chi eisiau gwneud hynny?

alla i faethu os ydw i’n gweithio’n llawn amser?

Mae bywyd modern yn brysur, rydyn ni’n deall hynny. Os yw eich amserlen yn llawn dop, efallai y bydd angen cymorth ychwanegol arnoch yn eich rôl fel gofalwr maeth, a hynny gan deulu a ffrindiau. Ond peidiwch â gweld eich gyrfa amser llawn fel rhwystr i’ch gofal maeth.

Efallai y bydd angen meddwl yn fwy gofalus am bethau os oes gennych chi  fywyd prysur. Does dim dwywaith am hyn – mae maethu’n ymrwymiad sy’n galw am dîm. Byddwch chi’n gweithio gyda chymysgedd o weithwyr cymdeithasol, gweithwyr cymorth, athrawon a therapyddion. Ac rydyn ni yma i’ch cefnogi chi bob cam o’r ffordd.

alla i fod yn ofalwr maeth os ydw i’n byw mewn llety rhent?

Os ydych chi’n teimlo’n ddiogel yn lle rydych chi’n byw, yna fe ddylai plentyn deimlo’n ddiogel hefyd. Does dim ots os ydych chi’n rhentu neu’n talu morgais. Gallwn ni helpu i weld beth sy’n gweithio orau i’ch amgylchiadau chi yn dibynnu ar ble rydych chi’n ei alw’n gartref.

alla i faethu os oes gen i blant fy hun?

Dydy’r teulu maeth arferol ddim yn bodoli. Os oes gennych chi blant eich hun yn barod, mae gofalu am blentyn maeth yn golygu ymestyn eich teulu i garu a gofalu am ragor o bobl.

Mae cael brodyr a chwiorydd maeth yn gallu bod yn hynod o werth chweil. Mae’n gallu rhoi profiadau newydd i’ch plant a’u helpu i ffurfio cyfeillgarwch fydd yn para am oes. Mae hefyd yn gallu datblygu eu gallu i ofalu am eraill.

ydw i’n rhy hen i faethu?

Does dim terfyn oedran uchaf ar gyfer bod yn ofalwr maeth. Gallwch chi ddechrau ar y daith hon yn eich 20au neu yn eich 70au. Ni waeth beth yw eich oedran, byddwn ni’n sicrhau eich bod chi’n cael yr holl gymorth a hyfforddiant lleol arbenigol sydd eu hangen arnoch chi i fod y gofalwr gorau y gallwch chi fod.

ydw i’n rhy ifanc i faethu?

Does dim terfyn oedran uchaf na therfyn oedran isaf chwaith. Er bod profiad bywyd yn fonws defnyddiol iawn, dydy bod yn ifanc ddim yn golygu na allwch chi faethu. Gyda’n rhwydwaith cymorth cynhwysfawr i’ch arwain, gallwch fwynhau’r daith, beth bynnag fo’ch oedran.

a oes rhaid i gyplau sy’n maethu fod yn briod neu mewn partneriaeth sifil?

Mae sefydlogrwydd yn rhywbeth sydd ei angen ar bob plentyn. Does dim ots p’un ai ydych chi’n sengl neu mewn perthynas, cyn belled â’ch bod chi’n gallu cynnig cartref da a’r agwedd iawn. Bydd eich tîm Maethu Cymru Caerdydd yn eich helpu i weld ai dyma’r amser iawn i chi ddechrau maethu.

alla i faethu os ydw i’n drawsryweddol?

Gallwch. Dydy eich rhywedd ddim yn cael unrhyw effaith ar a fyddwch chi’n ofalwr maeth da. Eich personoliaeth, eich sgiliau a’ch natur ofalgar sydd bwysicaf.

alla i faethu os ydw i’n hoyw?

Gallwch. Dydy eich cyfeiriadedd rhywiol ddim yn ffactor o ran gofal maeth. Y ffactorau pwysicaf yw eich ymrwymiad i fod yn ofalwr sy’n gwrando ac yn gofalu am y plentyn ac yn rhywun sy’n gallu cynnig lle diogel iddo fyw.

alla i faethu os oes gen i gi neu gath?

Dydy cael ci, cath, neu unrhyw fath arall o anifail anwes, ddim yn golygu na allwch chi fod yn ofalwr maeth. Byddwn ni’n cynnwys anifeiliaid anwes yn eich asesiad, er mwyn gwneud yn siŵr y byddan nhw ac unrhyw blant maeth yn y dyfodol yn cyd-dynnu.

Mae anifeiliaid anwes yn aml yn gallu bod yn fuddiol dros ben ac maen nhw’n gallu cynnig math gwahanol o gymorth mewn teulu maeth.

alla i faethu os ydw i’n ysmygu?

Mae gan bob Awdurdod Lleol bolisi gwahanol ar ysmygu a gofal maeth (mae hyn yn cynnwys e-sigaréts). Gallwn gynnig arweiniad ar sut i roi’r gorau i ysmygu, os hoffech chi. Fel gyda phob rhan o’n proses faethu, mae’n ymwneud yn ei hanfod â dod o hyd i’r gyfatebiaeth iawn rhwng eich teulu a’r plant yn ein gofal.

alla i faethu os ydw i’n ddi-waith?

Rydyn ni’n deall nad yw unrhyw swydd yn ddiogel a bod gwaith yn gallu bod yn gyfnewidiol. Mae bod yn rhiant maeth da yn golygu bod ar gael i gynnig cymorth, arweiniad a chariad bob dydd pwy bynnag fo’ch cyflogwr.

Os nad oes gennych chi swydd, neu os yw eich gwaith o dan fygythiad, gallwch chi faethu o hyd. Byddwn yn gweithio gyda chi i wneud yn siŵr mai dyma’r amser iawn i chi ddechrau maethu.

alla i faethu os nad oes gen i dŷ mawr?

Os oes gennych chi galon fawr, does dim angen cartref mawr arnoch chi. Does dim rhaid i chi fod â phlasty na thŷ enfawr i faethu plentyn. Yr hyn sydd ei angen arnoch chi yw ystafell sbâr lle gall plentyn deimlo’n gartrefol.